.jpg)
ஆட்சி மாற்றத்தின் பின்னணியில் அரசியல் பழிவாங்கல்களும் பிரிவினைக்கான ஒப்பந்தமும் மட்டுமே காணப்படுகின்றன. ஜனநாயக சாயம் பூசி வடக்கு கிழக்கிற்கான தேவைகள் பூர்த்தி செய்யப்படுகின்றதென குற்றம் சுமத்தும் பொதுபல சேனா பெளத்த அமைப்பின் பொதுச் செயலாளர் கலகொட அத்தே ஞானசார தேரர் சர்வதேசத்தின் முன்னிலையில் சிங்கள பெளத்த இனத்தை நிர்வாணப்படுத்தும் செயலை தேசிய அரசாங்கம் செய்வதாகவும் தெரிவித்தார்.
பொதுபலசேனா பெளத்த அமைப்பினால் ஏற்பாடு செய்யப்பட்டிருந்த செய்தியாளர் சந்திப்பின் போதே அவர் மேற்கண்டவாறு தெரிவித்தார். அவர் மேலும் குறிப்பிட்டதாவது,
தற்போது ஏற்பட்டுள்ள ஆட்சி மாற்றமானது நாட்டிற்கும் சிங்கள பெளத்த அமைப்பிற்கும் நன்மையைத் தருமென நினைப்பது வெறும் கனவு மட்டுமே. சிங்கள மக்களை அழிக்கவே தற்போதைய தேசிய அரசாங்கம் செயற்பட்டு வருகின்றது. அனைவரையும் ஒன்றிணைத்து கூட்டு ஆட்சியினை உருவாக்கியிருப்பது சாதகமானதென வெளியில் விளம்பரப்படுத்துகின்றனர். ஆனால் மறைமுகமாக சர்வதேச சதித்திட்டம் அரங்கேறுகின்றது.
அரசியல் பழிவாங்கல்கள்
மாற்றத்தினை ஏற்படுத்துவது தொடர்பில் எமக்கு தனிப்பட்ட கருத்து எதுவுமில்லை. ஆனால் தற்போது ஏற்பட்டுள்ள ஆட்சி மாற்றத்தின் பின்னணியில் தனிப்பட்ட அரசியல் பழிவாங்கல் மட்டுமே உள்ளது. முன்னாள் ஜனாதிபதி பாதுகாப்புச் செயலாளர் ஆகியோர் மற்றும் அவர்களது குடும்பத்தின் மீது தவறான கருத்துக்களை பரப்பி ஒரு சிலரின் தனிப்பட்ட கோபங்களுக்காக பழிவாங்கப் பார்க்கின்றனர். யார் குற்றம் செய்தாலும் அதற்கான தண்டனை வழங்கப்பட வேண்டும். ஆனால் செய்யாத குற்றங்கள் எதையும் ஒருவர் மீது சுமத்தி அவரை தண்டிக்க நினைப்பது ஏற்றுக்கொள்ள முடியாத விடயம். அதையே தற்போது புதிய அரசாங்கம் செய்து வருகின்றது.
பிரிவினை வளர்கின்றது
ஆட்சி மாற்றம் அதன் பின்னர் நூறு நாட்கள் வேலைத்திட்டம் என மக்களை ஏமாற்றும் வேடிக்கைகள் காணப்பட்டாலும் ஆட்சி மாற்றத்தின் பின்னணியில் புலம்பெயர் அமைப்புகளுக்கு ஏற்ற வகையில் வடக்கு, கிழக்கு மாகாணங்களுக்கு தேவையான பிரிவினை வளர்க்கப்படுகின்றது. தமிழ் அமைப்புகளின் தனி நாட்டுக் கோரிக்கைகளுக்கு அமைய வேலைத்திட்டங்கள் முன்னெடுக்கப்படுகின்றன. ஊடகங்களுக்கும் மக்களுக்கும் தெரியாது வடக்கு கிழக்கு மாகாணங்கள் கோரும் தனி நாட்டுக் கோரிக்கைகள் நிறைவேற்றப்பட்டு வருகின்றன. முப்பது வருடங்கள் போராடி விடுதலைப் புலிகளினால் வென்றெடுக்க முடியாத தனி நாட்டினை தற்போது அரசியல் உடன்படிக்கைகளின் மூலம் வென்றெடுக்க முயற்சிக்கின்றனர்.
கடாபியைப் போல் பார்க்கின்றனர்
லிபியாவில் நடந்த எவையும் இலங்கையில் இடம்பெறவில்லை. மக்களுக்கு தேவையானவற்றையே மஹிந்த ராஜபக்ஷ செய்து கொடுத்தார். ஆனால் தற்போது பிரிவினை வாதிகள் அனைவரும் ஒன்றிணைந்து முன்னாள் ஜனாதிபதியையும் பாதுகாப்பு செயலாளர் கோத்தபாய ராஜபக்ஷவையும் கடாபி போன்றோருக்கு சமமாக ஒப்பிடுகின்றனர்.
சிங்கள பெளத்தம் காப்பாற்றப்பட்டது இவர்களினால் மட்டுமே. ஆனால் காப்பாற்றி பாதுகாத்து வந்த சிங்கள பெளத்த கொள்கையினை புதிய அரசாங்கம் முற்றாக அழித்து வருகின்றது. சர்வதேசத்தின் மத்தியில் சிங்கள பெளத்த மதத்தினையும் இனத்தவரையும் நிர்வாணப்படுத்தி அசிங்கப்படுத்தும் வகையில் இவர்கள் செயற்பட்டு வருகின்றனர்.
எம்மை கட்டுப்படுத்த முடியாது
ஆனால் நாம் தொடர்ந்தும் பெளத்த சிங்கள இனத்தினை காப்பாற்ற போராடுவோம். பெளத்த இந்து கலாசாரம் இன்று முஸ்லிம், கிறிஸ்தவ தீவிரவாதிகளால் அழிக்கப்பட்டு வருகின்றது. இதனை நாம் தடுக்க சகல விதத்திலும் போராடுவோம். எம்மை யாராலும் கட்டுப்படுத்த முடியாது எனவும் அவர் தெரிவித்தார்.
No comments:
Post a Comment